بچاؤ کے لیے ہدایات

کوویڈ ۱۹ ایک بہت تیزی سے پھیلنے والا وائرس ہے جو متاثرہ شخص کے سانس کے نظام پر حملہ کرتا ہے۔ خوش قسمتی سے ہمارے پاس بہت سے آسان اور مؤثر طریقے ہیں جن سے ہم وائرس کا پھیلاؤ روک سکتے ہیں اور نقصان کو کم سے کم رکھ سکتے ہیں۔

وائرس سے محفوظ رہنے کا سب سے مؤثر طریقہ یہ ہے کہ ذاتی صفائی کا خیال رکھا جائے

آپ نے خبروں میں سنا ہوگا کہ معاشرتی فاصلہ رکھنا وائرس کو روکنے میں بہت مددگار ثابت ہوتا ہے۔ جتنا زیادہ ممکن ہو، معاشرتی فاصلہ رکھنا چاہیے۔ باہر جانے پر بہر حال مکمل پابندی بھی نہیں۔ آپ کو سودا لینے یا طبی امداد لینے کے لیے ڈاکٹر کے پاس جانا پڑ سکتا ہے۔ کوشش کریں کہ بہت ضروری کام سے ہی باہر جائیں۔

دوسروں سے کم از کم ایک میٹر دور رہیں، ہاتھ ملانے یا گلے ملنے سے پرہیز کریں، فاصلے سے سلام کریں اور اگر ماسک اور دستانے میسر ہوں تو ضرور پہنیں۔ اگرچہ یہ وائرس جانوروں سے نہیں پھیلتا، پھر بھی گوشت کی منڈیوں سے دور رہیں اور اپنی خوراک میں گوشت کا استعمال کم رکھیں۔

اگر آپ یا آپ کا کوئی جاننے والا بیمار ہو جائے تو اسے فوراً دوسروں سے الگ کر دیں اور ان کے لیے علیحدہ برتن استعمال کریں۔ زائد کمرہ ہو تو انھیں اس میں رکھیں لیکن اگر جگہ محدود ہو تو ان کے لیے الگ جگہ بنا دیں جہاں کوئی اور نہ جائے اور "کیا میں کوویڈ ۱۹ کا شکار ہوں؟" والا سیکشن پڑھیں۔